miércoles, 21 de mayo de 2014

PUXA MAFALDA! En 2011 publiqué esti artículu nel selmanariu Les Noticies. Güei ye un bon día pa reconocer que m'enquivocaba

Llobos, raposos, Zorrilla



Cuenta António Lobo Antunes (El País, 22 de payares de 2003) qu’acudiera a una conxusta d’escritores convocaos por Mário Soares pa discutir sobre’l treslláu de los restos de Fernando Pessoa al monesteriu de los Xerónimos. La impresión d’aquelles glories que nos da Antunes fai que pensemos nun circu de nanos. Confiesa que-y disgusta lo que se publica en Portugal: “La sinfinidá de noveles deshonestes, entendiendo por deshonestes, non la falta de valor intrínsecu propiu, sinón la rede de lucru rápidu a traviés de la trivialización de la vida”.  Non yera ésti’l casu d’Augusto Abelaira, un home menudu, pero d’una seriedá intelectual y d’una fidelidá a unos principios de rigor, que facíen que pa velu unu tuviera que mirar p’arriba. Esti artículu fai que m’alcuerde d’una entrevista a Walter Kempowski, ún de los principales autores alemanes, nel F.A.Z. del 22 de setiembre de 2006, pocos meses antes de la so muerte. Quexábase de falta de reconocencia. Aprovechaba, como yera vezu n’elli, pa soltar un par de cañonazos contra Günter Grass: ¿Qué ye que nun sabía que les SS yeren criminales? Tien que tomanos por tochos, dicía. Quexábase de la sospecha que llevanta l’humor: “Lo que puen entender, nun tien valor dalu”. “Tener que rise de daqué, a los alemanes paez-yos sospechoso”.  “A la xente mozo educáronlo los de la xeneración del 68, y los revolucionarios nun tienen sentíu del humor”. Cierto, yo tampoco m’esplico cómo entá nun-y dieron nengún de los Premios Príncipe al creador de Mafalda, y sí a otros mercachifles de la mercadotecnia. Lo que me fai alcordame d’otra entrevista n’El País a la familia de Delibes, na que dicíen que l’escritor morriera desilusionáu porque en Valladolid, en vez del suyu, -y punxeren al estadiu’l nome de Zorrilla. Al cazador adelantárase-y la raposa. ¿Nun ye pa rise?