La segunda fola del fascismu: Nun díbemos mui descaminaos

 http://canales.elcomercio.es/extras/asturies/articulos/111028_entrevistes.html

ENTREVISTES

28 d' Ochobre de 2011

«N’asturianu escríbese por amor al arte»
XAVIERO CAYARGA ESCRITOR

ENRIQUE CARBALLEIRA

ESCENARIU. Xaviero Cayarga, nel castiellu de Wewelsburg.

El castiellu de Wewelsburg, destruyíu demientres la Guerra de los Trenta Años y vueltu a construyir, foi un centru d’importancia nel rexime nazi n’Alemaña. Alquiláu nel añu 1934 pol llugarteniente de Hitler, Heinrich Himmler, trataron de convertilu nel centru del nuevu mundu que diba xurdir depués de la victoria del Tercer Reich. Esti castiellu ye’l centru de la nueva novela del narrador y poeta, Xaviero Cayarga (Cangues d’Onís, 1967), ún de los escritores más reconocíos de la lliteratura asturiana, ganador de premios como’l Teodoro Cuesta y Xuan María Acebal. El títulu, ‘El sol negru de Wewelsburg’.

–Faganos unos primeros apuntes del argumentu.

–La novela describe’l procesu de vinculación d’un mozu asturianu con un grupu neonazi, cómo entra en contactu y les idees qu’esti grupu propaga. Sicasí, anque podía esperase, nun ye una novela d’acción o d’aventures. Interesábame más mostrar los mecanismos qu’emburrien a facer atractives estes ideoloxíes y a analizar l’argumentación que s’escuende tres el cantu de serena del recursu a la violencia, daqué que yá tratara na novela anterior ‘Trastes de bufarda’ (2005).

–¿Cambió munchu esta ideoloxía nazi dende’l so entamu?

–Esisten múltiples ramificaciones nel movimientu neonazi modernu, pero no fundamental retomen los principios del nazismu d’entamos del sieglu xx: perda d’identidá, la esistencia d’una conspiración mundial xudeomasónica, la desmembración del Imperiu alemán y una mecigaya d’idees ocultistes que siguen el filu entamáu pola Teosofía d’Helena Blavatsky, coles fantasíes de les races superiores perdíes y los avatares, y qu’anguaño tienen continuidá nel entronque cola mitoloxía de los ovnis, que seríen restos del III Reich aguardando una nueva oportunidá pa facese col poder del mundu.

–¿Por qué decidió escribir sobre esti tema?

–La escritura de la novela quédame yá unos años atrás. Nel 2009 dediquéme a escribir una especie de diariu col títulu de ‘Les raíces del mal’, nel que fui anotando llectures y reflexones sobre’l orixe del mal, quería indagar nes razones pa desarrollar una teoría posible. La cosa quedó neso: en munches páxines con anotaciones y especulaciones, pero nun ellaboré un tratáu sistemáticu. Otra manera, fascinábame la vinculación del ideariu nazi col ocultismu, tanto’l nazismu d’entamos de sieglu XX que surde de les entrañes de delles sociedaes secretes, como la Sociedá Thule, hasta’l neonazismu actual que bebe nes mesmes fontes que les ciencies ocultes: el descreitu de lo oficial.

–El tema del revisionismu también ta mui presente. ¿Qué visión tien d’él?

–El revisionismu hestóricu y el revisionismu científicu danse la mano pa proclamar qu’esiste una versión oficial ‘falsa’ y una versión ‘alternativa o non oficial’, que ye la verdadera. Tres d’estos revisionismos namás que se topen hestories mui entreteníes pero que nun tienen pies nin cabeza. Son cuentos fantásticos que van dirixíos a un públicu que nun pue o quier pensar pero qu’anda a la busca d’una identidá mítica que los llibere de la rutina y l’anonimatu cotidianos.

–¿Nótase na cai la presencia d’esa ideoloxía?

–Evidentemente, la obra ta ambientada na ciudá na que vivo y el paisaxe y lo que pasa equí refléxense na narración. Llamentablemente, Dortmund garró nos últimos años fama de ser el bastión nazi de l’Alemaña occidental, anque esto nun se reflexe nuna representación política nel parllamentu o na casa conceyu; lo cierto ye que la so presencia na cai ye bultable, y la última manifestación convocada por esti colectivu, en setiembre, fizo que se cerrara’l centru urbanu y se paralizara l’actividá ciudadana. Les escenes de violencia que se recueyen nel llibru tán tomaes de la realidá, nun son frutu de la imaxinación.