Un poema de Bernard Spencer

Güertos: abril

Empedráu con piedra torpe que circunda’l mio pasu

el camín retuércese a traviés de los güertos cuadraos.

Ceguñando pa columbrar l’andarina nel sol que calienta,

¿de qué manera m’axunto

a esti día d’abril que surde y apellida,

agora que les sebes se presenten tan gráciles

y me saluden biltos amugaos, pequeñes manes, los sos papiros y abanicos espalmando?

Perdida pa dacualos de nosotros l’alegría festiva

al españíu de la tumba, el misteriu estacional,

Dios qu’echa andar otra vuelta tres xacer tol iviernu

talmente nesos llargos sucos llabraos nos campos

pa caltener caliente la raíz de la collecha.  En praos cuadraos

xiren los bailarinos calzaos con botes. Pero lo que yo oyo

ye’l corte de la pala na tierra pedreso cañicando la corea ñegrecío.

Y los cantares d’amor, la gracia medieval,

los versos cola xiblata, “L’únicu tiempu guapu pa casase”,

que dexaren de cantar.  Porque l’amor revienta como cazumbre

arriba nos miembros de los homes y aguanta toles estaciones

y el morrer de fame y la cortadura y caza terriblemente a traviés de la vida

p’alcontrar la so paz. Pero abril apuerta como

fedor de bestia espardío dende los campos, los martiellos, la presa al altu la lleva.

Les voces rudes de los rapazos xugando xunto a la sebe,

lo más masculines posible, les sos rises, les grandes venes

allongaes percima la fueya de remolacha, fueos d’un coloráu claro

de tiestos de flores amontonaos onde les cabañes; faen una pausa

nes voces radiaes repitiendo pactos, persecuciones

y encarcelamientos y muertes y muertes violentes amazapilaes,

impersonales agora como númberos nes noticies de la ciudá.

Detrás de min, les curves del pueblu. El so marxe parapetáu,

col so aspectu quemáu, guarda’l llau del ríu.

La esmolición pol dineru, el trabayu en baldre

d’aquellos que nun creen, probitú real,

l’acedu estragal del probe; abril qu’alegra

los árboles y enllena les carreteres al sur,

nin ñega nin escuende. Más bien amesta

lo que yo más soi; aguiya les glándules fonderes

y calienta los mios güesos animales mientres camino

más allá de los güertos y les vegues cantarines

onde les pezuñes del ganáu triaren y furaren, y

observo güei elevase como un solu respiru

calteniendo nel so aplausu a l’altura de mástiles

dos llameres y la so equilibrada actitú como bailarines, los sos brazos como bailarines.

Bernard Spencer (Madras,1909- Viena, 1963)