Vosotros qu’amáis Asturies

Vosotros qu’amáis Asturies

Vosotros qu’amáis Asturies, que vos llega la so música,

el movimientu sele de les ñubes en bendición,

aries clares de lluz estremeciendo les sos brañes,

sobre los acordes del veranu calteníos n’harmonía;

incesante’l contrapuntu de les fueyes nel aire viviegu l’oeste,

flor y ríu rizando l’allegro más encantador,

y les tormentes d'instrumentos de cuerda y vientu a lo cabero l’añu:

Escuchái. ¿Nun sois a sentir la entrada d’un tema nuevu?

Vosotros que salís solos, en tándem o nel asientu d’atrás,

circulando per carreteres principales n’abril,

o tristes xunto a llagos onde se reflexen llombes

faciendo fueos de fueyes, les vuestres altes esperances caíes.

Ciclistes y caminantes, escursionistes d’un día,

refuxaos de les ciudaes maldites y les árees devastaes;

sé que buscáis un mundu nuevu, un salvador pa establecer

llazos cuantayá perdíos y restaurar la plenitú del sangre.

A vosotros que vos presta la paz, bonos palos, felices coles coses pequeñes

contemplando páxaros o xugando a los bolos con escolinos,

que convidáis a unes botelles, que nun vos garró la desgracia;

entá pasando molinos abandonaos y teyaos de tenaes en venta

onde ardió’l desesperu –corazones paraos–,

que sufrís la pérdida, conscientes d’una mengua de vitalidá;

podemos dicivos un secretu, ofrecevos una tónica; namás

proponer al ánxel visitador, al curador estrañu y nuevu.

Vosotros, sobre too, que llegastis a la fin del camín, víctimes

d’una máquina parada, que nun podéis aguantar muncho más;

lo mesmo en sielles fáciles remontaos pola impotencia

o contra la fame, matones y espíes calteniendo’l

ñerviu pa l’acción, la chispa de la indignación.

Nun necesitáis lluchar más na escuridá, conocéis a los vuestros enemigos.

Habéis de convertivos en cabezaleros cuando s’anuncie la hora cero,

empobinadores del poder y soldadores d’un mundu nuevu.

Cecilio Díaz , escribió col nomatu de Guy Fawkes (Bimenes, 1904 –Xixón, 1972)